Во периодот од 24 до 26 јули, во Истанбул, Република Турција, се одржува еден од најзначајните меѓународни саеми за високо образование, кој ги обединува водечките универзитети од регионот и пошироко. Во рамките на заедничкиот настап на Универзитетот „Св. Кирил и Методиј“ – Скопје (УКИМ), свое претставување има и Факултетот за физичко образование, спорт и здравје (ФФОСЗ).

Факултетот на саемот го претставува деканот, проф. д-р Влатко Неделковски, кој преку посебен промотивен штанд ги презентира студиските програми, современите услови за студирање, научно-истражувачката дејност, како и можностите за академски и професионален развој што ги нуди ФФОСЗ.

Настапот на овој престижен меѓународен настан претставува значаен чекор во процесот на интернационализација на факултетот, отворајќи нови можности за воспоставување академски партнерства и зајакнување на меѓународната препознатливост на ФФОСЗ како современа високообразовна институција.

Посебен акцент е ставен на промоцијата пред странските студенти, кои покажуваат сѐ поголем интерес за студирање на Универзитетот „Св. Кирил и Методиј“ – Скопје, а особено за студиските програми на Факултетот за физичко образование, спорт и здравје. Преку директните средби, презентации и разговори со потенцијалните кандидати, посетителите имаат можност одблиску да се запознаат со квалитетот на наставата, современата инфраструктура и широките можности што ги нуди факултетот.

Со своето учество на меѓународниот саем во Истанбул, ФФОСЗ уште еднаш ја потврдува својата определба кон отворање кон светот, привлекување на интернационални студенти и градење на силна академска репутација надвор од границите на нашата државата. Ова претставува важен исчекор во позиционирањето на факултетот како регионален лидер во областа на физичкото образование, спортот и здравјето, со јасна визија за понатамошен развој и меѓународна афирмација.